A Pontenova crea unha bolsa de emprego para contratar traballadores sociais

AMariñaXa
O proceso selectivo será por concurso-oposición e permitirá realizar contratacións temporais para cubrir baixas, vacacións, vacantes ou necesidades puntuais do servizo
A-Pontenova-concello
17 Nov 2026

O Concello da Pontenova aprobou as bases para constituír unha bolsa de emprego de traballadores sociais coa que atender as necesidades temporais do departamento municipal de Servizos Sociais. A convocatoria permitirá realizar contratacións laborais de duración determinada para substituír o persoal en situación de incapacidade temporal, cubrir vacacións, licenzas e permisos ou responder a acumulacións puntuais de tarefas e outras necesidades urxentes.

A bolsa tamén poderá utilizarse para cubrir provisionalmente prazas vacantes, mentres non se resolva o procedemento legal para a súa provisión definitiva. As contratacións estarán limitadas ao tempo que dure a circunstancia que motive cada incorporación e non poderán empregarse para cubrir postos fixos de carácter indefinido.

O sistema de selección será o de concurso-oposición. Na fase de oposición, as persoas aspirantes deberán responder un cuestionario tipo test de 60 preguntas e outras cinco de reserva, cun tempo máximo de 70 minutos. Cada resposta correcta sumará 0,50 puntos, mentres que as respostas incorrectas e as preguntas en branco non restarán puntuación. Para superar esta proba será necesario acadar polo menos 15 dos 30 puntos posibles.

A fase de concurso permitirá valorar ata 20 puntos en méritos. A experiencia profesional poderá achegar un máximo de dez puntos, con diferente valoración segundo os servizos se prestasen en administracións públicas ou en empresas públicas e privadas. A formación relacionada coas funcións do posto ou de carácter transversal poderá sumar outros dez puntos.

Entre os requisitos para participar figuran contar coa titulación de Diplomatura ou Grao en Traballo Social, ou equivalente, e acreditar o nivel CELGA 4 de galego ou unha certificación homologada. Tamén será necesario ter cumpridos os 16 anos, posuír a capacidade funcional para desempeñar as tarefas e cumprir o resto das condicións establecidas nas bases.

As solicitudes deberán presentarse no prazo de cinco días naturais, contados desde o día seguinte ao da publicación do anuncio da convocatoria no Boletín Oficial da Provincia de Lugo. Xunto coa instancia será preciso achegar a documentación identificativa, a titulación, a acreditación lingüística e os xustificantes dos méritos que se queiran valorar.

As persoas que superen o proceso quedarán incorporadas á bolsa por orde de puntuación. A súa vixencia será dun mínimo dun ano e dun máximo de catro, aínda que quedará sen efecto se se realiza unha nova convocatoria antes de que remate ese período.

0.13656687736511