A Pontenova celebrará en maio a XVII Concentración de Sendeirismo
A Pontenova volverá converterse este mes nun punto de encontro para os amantes do sendeirismo coa celebración da XVII Concentración de Sendeirismo, unha actividade xa consolidada no calendario local e que reunirá a participantes de diferentes lugares nunha xornada marcada pola convivencia e o contacto coa natureza.
A proposta desenvolverase o vindeiro 23 de maio e contará cun percorrido de 9,4 quilómetros entre Sanxés e Bogo, cun nivel de dificultade media. A organización recomenda acudir con calzado cómodo e con boa adherencia, ademais de utilizar bastóns de trekking para facilitar o traxecto.
A programación arrancará ás 09:00 horas coa concentración das persoas participantes na Praza dos Fornos. Media hora despois iniciarase a ruta, que permitirá descubrir diferentes recunchos naturais do municipio nun ambiente deportivo e familiar.
Unha vez rematada a andaina, os asistentes poderán desfrutar dunha comida popular prevista para as 15:00 horas tamén na Praza dos Fornos. O menú estará composto por bolos de liscos, bolos preñados, sobremesa e auga, nun momento pensado para compartir experiencias tras a camiñada.
A xornada concluirá cun sorteo de agasallos entre os participantes, no que haberá diferentes premios relacionados co turismo e o sendeirismo, como prendas deportivas, ceas para dúas persoas, estancias dunha noite ou experiencias vinculadas á Mina Consuelo e á tirolina das minas.
A inscrición inclúe mochila de tea con petisco e auga, transporte, seguro de responsabilidade civil e comida. O prazo para anotarse permanecerá aberto ata o 20 de maio.
A actividade está organizada pola Asociación Cultural e Deportiva Carro Tarabelo coa colaboración do Concello da Pontenova e de diferentes negocios e entidades da zona.