A Pontenova acollerá tres días de espectáculos para toda a familia no seu Festival de Maxia
A Pontenova converterase do 24 ao 26 de xullo no escenario do Festival de Maxia, unha cita dirixida a toda a familia que ofrecerá durante tres días espectáculos de ilusionismo, humor e actividades para todas as idades na Praza dos Fornos e noutros espazos do municipio.
A programación arrancará o venres 24 cunha sesión de maxia nos centros de día e na residencia de maiores. Ás 16.00 horas actuarán Judith Trulir e Roberto Lolo, mentres que ás 17.00 horas será a quenda de Román García e Samuel Moreno.
Xa pola tarde, entre as 19.30 e as 21.00 horas, diferentes cafeterías da localidade acollerán sesións de maxia de preto a cargo de Samuel Moreno, Roberto Lolo, Mago Joel de Cuba e Román García.
O sábado 25, ás 12.30 horas, celebrarase un espectáculo infantil no que participarán Samuel Moreno, Judith Trulir e Mago Joel de Cuba. Pola noite, ás 20.30 horas, Dani DaOrtiz ofrecerá un espectáculo unipersoal.
A partir das 21.30 horas habilitarase un servizo de churrasco na Praza dos Fornos e, ás 23.30 horas, Jaime Figueroa protagonizará un espectáculo que combinará monólogo, maxia e ventriloquía. A xornada rematará cunha sesión musical a cargo dun DJ.
O domingo 26 abrirase cun novo espectáculo infantil ás 12.30 horas, no que participarán Roberto Lolo, Judith Trulir, Mago Joel e ACM. Ás 13.30 horas celebrarase unha sesión vermú acompañada de inchables gratuítos para os máis pequenos.
O peche do festival terá lugar ás 20.30 horas coa gala final, que reunirá sobre o escenario a Samuel Moreno, Jaime Figueroa, Judith Trulir, Mago Joel de Cuba e Roberto Lolo, que exercerá ademais como presentador do espectáculo.