A Plataforma da Sanidade denuncia a retirada da súa pancarta reivindicativa en Viveiro
A Plataforma en Defensa da Sanidade Pública da Mariña denunciou a retirada da pancarta reivindicativa que permanecía instalada desde hai máis dun ano no valado do porto deportivo de Viveiro, fronte ao centro de saúde. O colectivo considera que esta decisión non freará as súas reivindicacións e asegura que continuará reclamando melloras para unha Atención Primaria que cualifica de "cada vez máis deteriorada".
A faixa, na que podía lerse o lema "Pola resurrección da nosa sanidade", fora colocada como un símbolo das mobilizacións veciñais desenvolvidas nos últimos anos para reclamar unha maior dotación de profesionais sanitarios no municipio. O seu contido facía tamén unha referencia, en clave de retranca, ao coñecido evento musical Resurrection Fest.
Segundo explica a plataforma, a retirada foi ordenada por Portos de Galicia, organismo dependente da Consellería do Mar e responsable da xestión do porto deportivo de Viveiro. A portavoz do colectivo, Montse Porteiro, afirmou que a pancarta será recolocada noutro emprazamento, ao tempo que advertiu de que a organización non renunciará ás súas reivindicacións.
Porteiro criticou que, ao seu xuízo, as administracións dediquen esforzos a eliminar este tipo de mensaxes reivindicativas en lugar de afrontar os problemas asistenciais que, asegura, afectan tanto ao centro de saúde de Viveiro como ao conxunto da comarca. Na súa opinión, a pancarta non ocasionaba molestias nin representaba risco algún para a seguridade ou para a contorna.
A plataforma insiste en que a situación da Atención Primaria en Viveiro continúa agravándose pola falta de substitución de profesionais. Segundo expón, un centro que debería contar con once médicos de familia está a funcionar habitualmente con apenas seis facultativos, circunstancia que, asegura, incrementa a carga asistencial, alonga as listas de espera e repercute tanto nas condicións laborais do persoal como na atención á cidadanía.
O colectivo sostén que, na actualidade, hai pacientes que deben agardar ata dous meses para conseguir unha consulta de medicina de familia, unha situación que considera inasumible e que atribúe á insuficiencia de persoal.
A plataforma advirte ademais de que esta problemática non se limita a Viveiro, senón que afecta ao conxunto da Atención Primaria da Mariña. Lembra que durante o período estival a poboación da comarca aumenta de forma considerable sen que, segundo denuncia, se reforcen os cadros de persoal para atender tanto á veciñanza como ás persoas desprazadas.
Por todo iso, o colectivo fai un chamamento á Xunta para que priorice a resolución das carencias sanitarias e adopte medidas que permitan recuperar a calidade asistencial. Ao mesmo tempo, asegura que continuará impulsando accións reivindicativas ata que se dea resposta ás demandas da cidadanía.