A parroquia de Ferrería celebra as festas na honra a San Antonio o sábado 19
A parroquia de Ferrería, en Riotorto, celebra o sábado 19 de setembro as súas tradicionais festas na honra de San Antonio, cun completo programa de actividades que se prolongará durante toda a xornada.
Os actos comezarán ao mediodía, ás 13.30 horas, coa misa solemne, seguida da tradicional procesión e dunha sesión vermú para compartir entre veciños e visitantes. Pola tarde, ás 15.30 horas, celebrarase a comida veciñal, para a que as entradas estarán dispoñibles ata o martes 15 na gasolineira de Riotorto.
O menú estará composto por callos, costela asada, sobremesa, bebida pan e licores. Todo por un prezo de 27 euros.
Xa pola tarde, a partir das 18.30 horas, a festa continuará cunha actuación de Octopus Sound e cunha gran verbena amenizada polo dúo Son de festa e o Dj Bombardero, que poñerán o broche final a unha xornada de convivencia, música e celebración.
A organización das festas conta coa colaboración do Concello de Riotorto, e coa participación activa dos veciños e veciñas de Ferrería, que manteñen viva esta cita festiva e relixiosa ano tras ano.