A música e a cultura unirán Viveiro na homenaxe a Hernán Naval
O colectivo Pensamento e Sementeira de Viveiro celebrará o próximo venres 15 de maio, ás 20.00 horas, un acto de homenaxe dedicado a Hernán Naval, unha persoa moi vinculada á vida cultural e asociativa da vila e considerada unha das figuras máis representativas da creación e dinamización cultural en Viveiro.
A iniciativa busca poñer en valor tanto a súa traxectoria musical como o seu compromiso coa cultura galega e co impulso de numerosos proxectos culturais ao longo dos anos. Ademais da súa faceta como músico e compositor, Hernán Naval desenvolveu un intenso labor dentro do movemento asociativo local, especialmente á fronte da Asociación Cultural Sementeira, da que foi presidente.
Desde a organización lembran tamén a súa implicación na defensa e promoción do Teatro Pastor Díaz como espazo cultural de referencia, así como a súa participación activa en distintas iniciativas destinadas a fortalecer a actividade cultural na comarca.
O acto contará coas intervencións de Francisco Luis R. Guerreiro e Carlos Nuevo Cal, que repasarán diferentes aspectos da súa traxectoria persoal e cultural, ofrecendo unha visión da pegada que deixou tanto no ámbito artístico como humano.
A homenaxe completarase cun apartado musical no que participarán David Bellas, o sexteto vocal SondeNós e o Grupo de Cámara do Conservatorio de Viveiro. A programación foi concibida como unha celebración arredor da memoria, da música e do legado cultural que Hernán Naval contribuíu a construír ao longo da súa vida.
Esta iniciativa desenvolverase ademais en coordinación coa Asociación Francisco Lanza de Ribadeo, que organizará ao día seguinte outro acto de lembranza na localidade ribadense. A programación prevista inclúe unha comida de confraternidade e un concerto no que participarán a banda e a coral de Ribadeo.
Desde Pensamento e Sementeira destacan que esta homenaxe nace “do agradecemento e da necesidade de manter viva a memoria dunha persoa que deixou unha profunda pegada na cultura viveirense e en varias xeracións de veciños e veciñas”.