A música africana e a solidariedade daranse a man en Burela co concerto de Aba Taano
O Auditorio Municipal de Burela converterase o vindeiro 21 de agosto nun escenario de música e solidariedade coa celebración do concerto de Aba Taano, unha das formacións de gospel africano con maior proxección internacional. A actuación, organizada coa colaboración do Concello de Burela, destinará toda a recadación á ONG Música para Salvar Vidas, que desenvolve proxectos educativos e sociais en Uganda.
O concerto dará comezo ás 20.00 horas e ofrecerá ao público un espectáculo no que se mesturan o gospel, a música tradicional africana e unha posta en escena cargada de ritmo e emoción. A través das súas interpretacións, os cinco integrantes do grupo transmitirán unha mensaxe de esperanza e superación baseada na súa propia experiencia.
Aba Taano forma parte da ONG Música para Salvar Vidas, unha iniciativa que traballa para ofrecer educación, formación e novas oportunidades a nenos e mozos en situación de vulnerabilidade. O proxecto emprega a música como ferramenta de integración e desenvolvemento persoal, permitindo que moitos destes mozos poidan construír un futuro mellor.
A concelleira de Cultura, Lina Gómez, anima á veciñanza a asistir ao concerto e subliña que se trata dunha oportunidade para gozar dun espectáculo de gran nivel artístico e, ao mesmo tempo, colaborar cunha causa solidaria. A edil confía en que o Auditorio Municipal rexistre unha ampla asistencia para apoiar unha iniciativa que combina cultura e compromiso social.
As entradas teñen un prezo de 12 euros para o público xeral e de 6 euros para menores de 12 anos. Poderán adquirirse de forma anticipada en Azor, na rúa Arcadio Pardiñas, nos mercados semanais dos martes en Foz e dos venres en Burela, en Calzados Edelmiro e tamén a través da plataforma Giglon.
Desde o Concello destacan que esta cita permitirá aos asistentes descubrir a forza da música africana mentres contribúen a financiar un proxecto que mellora a vida de centos de nenos e mozos en Uganda.