A Mariña impulsa un modelo de experiencias agroturísticas sostibles a través do proxecto MISEA
A comarca da Mariña continúa consolidando a súa aposta pola innovación turística e o desenvolvemento do sector primario como parte da oferta de lecer do territorio a través da implantación do Modelo de Innovación Sostible de Experiencias Agroturísticas (MISEA). Esta iniciativa forma parte das estratexias promovidas pola Secretaría de Estado de Turismo de España mediante SEGITTUR, que impulsa novas fases de asesoramento técnico, formación e colaboración co tecido produtivo e empresarial local.
Nesta edición, A Mariña converteuse no único destino galego seleccionado para participar neste proxecto de ámbito estatal, compartindo espazo de traballo con territorios como a Diputación de Cáceres, Fuerteventura, Urgell e Valencia, todos eles integrados na rede de Destinos Turísticos Intelixentes. O obxectivo do programa é integrar o sector primario dentro do sistema turístico, promovendo experiencias agroturísticas que xeren novas oportunidades económicas e ao mesmo tempo respecten a actividade principal de produtores e empresas.
A presidenta da Mancomunidade, Rocío López, explicou que a filosofía do proxecto busca estruturar a relación entre turismo e produción local mediante propostas sostibles que permitan diversificar a oferta sen alterar o funcionamento habitual das explotacións e pequenas industrias agroalimentarias. Segundo sinalou, a iniciativa pretende poñer en valor o produto autóctono e contribuír á visibilización do traballo realizado no territorio.
O desenvolvemento do proxecto inclúe un traballo colaborativo entre técnicos, produtores e profesionais do sector turístico. Tras as primeiras sesións celebradas en novembro, o pasado 24 de mes continuaron as reunións do chamado Grupo de contraste, un espazo de análise e debate que permite achegar unha visión práctica á implementación do modelo.
Nesta reunión participaron representantes de entidades como Turismo Slow Norte de Galicia, o Colectivo de Gastronomía da Mariña, o GDR Terras de Miranda e a mesa de calidade SICTED, ademais dunha axencia de viaxes. O encontro permitiu intercambiar experiencias e achegar coñecemento técnico para favorecer a correcta implantación do modelo turístico.
Paralelamente, os dez produtores e pequenas empresas transformadoras participantes recibiron formación específica sobre promoción e comercialización de experiencias agroturísticas. Durante o proceso abordouse a creación dunha estratexia estruturada baseada nos seis pasos definidos polo MISEA, tal e como explicou a xerente da Mancomunidade, Tania Hermida.
Os promotores que forman parte desta fase do proxecto son a Cooperativa Terras da Mariña, Agroalimentaria Laurentina, Porto de Burela, Marmeladas A Morena, Mel O Poder das Flores, Porco Celta Celtagal, Bodega don Pedro Leivas Sidra Salvaxe, o Monte Veciñal en Man Común de Frexulfe, a Panadería de Galdo e Shiifos Setas.
Hermida destacou a elevada motivación dos participantes e o interese por desenvolver un modelo de experiencias que achegue valor engadido aos produtos locais. Segundo indicou, o proxecto está aliñado cunha visión de turismo de calidade, sostible e profundamente conectada coa identidade cultural e natural da Mariña, reforzando a autenticidade do destino.
O programa MISEA inclúe acompañamento técnico especializado, formación e a elaboración dun plan de acción tanto conxunto como individualizado para os promotores. Durante os meses de marzo e abril a Mancomunidade recibirá a folla de ruta estratéxica para o destino, documento no que terá un papel destacado o Colectivo de Gastronomía da Mariña como axente de transformación territorial.
Os plans de mellora individualizados permitirán aos produtores traballar de forma máis precisa na creación ou perfeccionamento das experiencias turísticas que desexen impulsar. Desde SEGITTUR prevese dispoñer dos resultados finais do proxecto entre maio e xuño.
A presidenta da Mancomunidade concluíu que o obxectivo é configurar unha rede de experiencias agroturísticas viables e estruturadas baixo principios de sostibilidade, autenticidade e vinculación co territorio. Segundo afirmou, esta iniciativa reforza a aposta pola innovación turística responsable, consolidando a Mariña como un destino intelixente que avanza en calidade e sustentabilidade mediante o Plan de Sostibilidade Turística de España e a colaboración anual coa Xunta de Galicia e a Deputación de Lugo.