A Mariña despedirá o ano correndo con San Silvestres en San Cibrao, O Vicedo e Ribadeo
O último día do ano volverá ter un marcado carácter deportivo na Mariña, con varias citas que convidan a despedir o 2025 facendo exercicio e compartindo unha xornada festiva. San Cibrao, O Vicedo e Ribadeo celebrarán as súas respectivas carreiras de San Silvestre, cunha ampla oferta de categorías e percorridos pensados para todos os públicos.
En San Cibrao, a Praza dos Campos converterase o 31 de decembro ás 12:00 horas no punto de saída da I Carreira Popular San Silvestre A Fume de Carozo, unha estrea que chega con vocación de continuidade. A proba inclúe unha carreira absoluta de 5 quilómetros e varios percorridos infantís de 1.800, 850 e 200 metros, para facilitar a participación da rapazada. A inscrición é gratuíta e pode realizarse a través dun formulario en liña. O evento está organizado polo Club de Trail A Fume de Carozo, coa colaboración do Concello de Cervo, que anima á veciñanza a sumarse a unha proposta pensada para despedir o ano en movemento e bo ambiente.
Pola súa banda, O Vicedo estreará tamén a súa propia carreira coa celebración da I San Silvestre O Vicedo 2025, organizada pola Comisión de Festas Patronais Santo Estevo do Val. A cita terá lugar na tarde do 31 de decembro e contará cunha proba infantil, para menores de 12 anos, cun percorrido aproximado de 500 metros e saída ás 16:30 horas, seguida da carreira absoluta de 5 quilómetros, prevista para as 17:00 horas. As inscricións deberán realizarse exclusivamente a través da web www.carrerasconencanto.com.
En Ribadeo, a San Silvestre chega á súa XXXV edición, consolidada como unha das probas máis emblemáticas do calendario deportivo local. A carreira disputarase o 31 de decembro de 2025 e volverá reunir centos de participantes polas rúas da vila. As inscricións, obrigatorias, permanecerán abertas ata o 25 de decembro na web www.championchipnorte.com. A programación inclúe varias carreiras infantís a partir das 16:40 horas, mentres que a proba principal, de 5 quilómetros, arrancará ás 17:00 horas. Haberá premios en metálico, trofeos, medallas e recoñecementos especiais, incluído un galardón para a persoa de maior idade que complete o percorrido. A cita conta coa colaboración de GADIS e EROSKI, e toda a información está dispoñible en sansilvestre.ribadeo.gal.
Tres escenarios diferentes, pero un mesmo espírito: despedir o ano facendo deporte, fomentando a participación e convertendo o 31 de decembro nunha festa compartida nas rúas da Mariña.