A Marcha Cicloturista de Viveiro celebra a súa 37ª edición cun percorrido de case 75 quilómetros
A Peña Ciclista Lar de Viveiro recupera un dos eventos máis emblemáticos da Mariña coa organización da Marcha Cicloturista, que este ano alcanza a súa 37ª edición. A proba desenvolverase o domingo 14 de setembro cun trazado esixente de 74,99 quilómetros, no que os participantes afrontarán un perfil montañoso que terá como punto culminante a subida ao Monte de San Roque.
Trátase dunha marcha de carácter non competitivo, aínda que contará con tramos cronometrados, e forma parte do calendario oficial da Federación Galega de Ciclismo. Está pensada para ciclistas afeccionados con boa preparación física, xa que acumula un desnivel positivo de 1.657 metros e un negativo de 1.306, cunha pendente media do 0,5 %. A organización dispuxo dous puntos de avituallamento sólido e líquido: un deles situarase entre os quilómetros 30 e 35, coincidindo coa contrarreloxo, e o outro na meta, no alto do San Roque.
O evento conta coa colaboración dos concellos de Viveiro, Ourol e Muras, así como da Deputación de Lugo. Desde a Peña Lar destacan o ambiente de compañeirismo que caracteriza esta cita, que ano tras ano reúne a ciclistas de diferentes lugares de Galicia e tamén doutros territorios.
Ademais do reto deportivo, a marcha supón unha oportunidade para reivindicar o patrimonio natural e paisaxístico da contorna, con estradas que percorren os montes viveirenses e as ladeiras de Ourol. A Marcha Cicloturista de Viveiro consolídase así como unha das probas imprescindibles para o ciclismo afeccionado en Galicia.