Infraestructuras

Un grupo vinculado á comisión impulsora do proxecto visitará tamén o Consello da Cultura Galega para presentar o traballo de recuperación da figura da mestra mindoniense

A Comisión Homenaxe a Andrea López Chao porá fin este 17 de marzo ao proceso de recuperación e divulgación da figura desta destacada mestra de Mondoñedo cun acto de recepción institucional no Parlamento de Galicia, no que participará unha representación de 17 persoas vinculadas ao proxecto.

A xornada desenvolverase en Santiago de Compostela e incluirá dúas visitas institucionais. Por unha banda, o grupo será recibido no Consello da Cultura Galega, e posteriormente no Parlamento de Galicia, co propósito de presentar publicamente o traballo realizado durante os últimos anos e dar maior visibilidade ao legado histórico e cultural de Andrea López Chao.

Durante estes encontros, a comisión fará entrega ás institucións dun dossier documental no que se recollen as principais iniciativas promovidas desde a creación do colectivo. O material inclúe tamén o monográfico dedicado á figura da educadora e o libro de actas das xornadas celebradas en 2023 en Mondoñedo e Vilalba, que reuniron a investigadores e especialistas arredor da súa traxectoria.

Este documento recompila o proceso de investigación e divulgación desenvolvido entre 2022 e 2026, un período no que se organizaron actos e actividades en diferentes cidades como Mondoñedo, Vilalba, Lugo, Vigo, Ares, Madrid ou A Habana, entre outros lugares, co obxectivo de recuperar para a memoria colectiva a figura desta pioneira.

Andrea López Chao, nacida en Mondoñedo en 1874 e falecida na Habana en 1954, foi unha destacada mestra e unha das figuras relevantes da diáspora galega e do movemento feminista das primeiras décadas do século XX. Na emigración cubana desenvolveu un intenso labor educativo e social, sendo impulsora da sociedade Hijas de Galicia e responsable do Plantel Concepción Arenal na Habana. Desde estas plataformas defendeu unha educación baseada en principios progresistas e igualitarios para as mulleres emigrantes.

A súa participación no Congreso Nacional de Mulleres de Cuba en 1923 consolidou o seu papel como unha das voces pioneiras na defensa dos dereitos das mulleres no ámbito transatlántico.

A Comisión Homenaxe a Andrea López Chao, creada en Mondoñedo no ano 2022, impulsou ao longo destes anos un amplo programa de iniciativas para recuperar e difundir a súa figura. Entre elas figuran xornadas divulgativas, publicacións, exposicións, instalación de placas conmemorativas, a dedicación dunha rúa no ano 2025 e a realización dun documental centrado no seu legado.

O acto institucional previsto no Parlamento galego supón o peche deste ciclo de traballo, aínda que desde a comisión sinalan que se abre agora unha nova etapa destinada a consolidar definitivamente a presenza de Andrea López Chao na memoria histórica e cultural de Galicia.

Pola súa banda, o concelleiro de Cultura de Mondoñedo, Alberto García, quixo agradecer o labor desenvolvido pola comisión durante estes anos. De maneira especial destacou o compromiso e a dedicación de Luis Fernández Ansedes, cuxo impulso resultou clave para coordinar as diferentes iniciativas e actividades organizadas tanto en Galicia como noutros lugares, contribuíndo de forma decisiva á recuperación da figura da educadora mindoniense.