A Heroican Race regresa a Ribadeo con 373 participantes na súa quinta edición
Ribadeo acollerá o vindeiro domingo, 28 de setembro, unha nova edición da Heroican Race, a quinta xa desta carreira de obstáculos que ano tras ano gaña adeptos. A organización confirmou a inscrición de 373 persoas, que se medirán a un esixente percorrido de entre 9 e 11 quilómetros no que deberán superar arredor de trinta retos físicos.
A recollida de dorsais poderá facerse o sábado nas instalacións de BeOne Ribadeo, situadas na rúa Pintor Fierros, durante o horario habitual de apertura. O domingo, os corredores tamén terán a posibilidade de retirar o seu número entre as 8:30 e as 12:00 horas no stand da organización, nas inmediacións da saída no parque de San Francisco.
A proba desenvolverase en 12 tandas consecutivas, que irán saíndo cada quince minutos desde as 10 da mañá ata as 12:45 horas. O deseño do circuíto e a variedade dos obstáculos prometen unha xornada chea de intensidade, esforzo e diversión tanto para os participantes como para o público que se achegue a seguir a competición.