A Fundación Sergio Villar presentarase este sábado no auditorio Hernán Naval de Ribadeo
O auditorio Hernán Naval de Ribadeo acollerá este sábado, 23 de maio, a presentación pública da Fundación Sergio Villar, unha entidade creada polos pais do mozo ribadense falecido no accidente de tráfico rexistrado en Xove en abril de 2023, no que tamén perderon a vida outros tres mozos da comarca.
O acto dará comezo ás 18:00 horas e permitirá achegar á veciñanza o traballo que está a desenvolver a fundación desde a súa creación na Coruña, cidade na que reside actualmente a familia tras a tráxica perda do seu fillo.
Desde o Concello de Ribadeo trasladaron o seu apoio á iniciativa e animaron á cidadanía a participar nesta presentación, que terá tamén un marcado carácter emotivo e de recordo. A concelleira de Benestar Social, Elena Sierra, lembrou que xa tivera ocasión de acompañar aos pais de Sergio Villar durante a posta de longo da fundación na Coruña o pasado ano.
A edil destacou que para ela foi “un orgullo” compartir aquel momento coa familia e asegurou que volver acompañalos agora en Ribadeo terá un significado especial. Segundo explicou, o municipio sente un forte cariño tanto por Sergio Villar como polos seus familiares, polo que considera importante dar a coñecer entre a veciñanza a actividade e os proxectos que impulsa a entidade.
Sierra fixo tamén un chamamento á participación da cidadanía, especialmente ás amizades, compañeiros e persoas próximas á familia, para arroupar aos seus membros neste acto de presentación. A responsable municipal considera que a presenza da veciñanza será unha mostra de apoio e acompañamento nun proxecto nacido a partir dunha situación especialmente dolorosa.
A Fundación Sergio Villar iniciou a súa actividade coa intención de converter a memoria do mozo ribadense nun impulso para desenvolver iniciativas sociais e humanas, mantendo vivo o seu recordo a través de diferentes accións e proxectos solidarios.