A Festa do Mexillón regresará a Forxán cun programa para todos os públicos
A área recreativa do Bispo Santo, en Forxán (Foz), converterase o vindeiro 1 de agosto no escenario da IV Festa do Mexillón, unha cita que regresa cun programa pensado para reunir a veciñanza e ás persoas visitantes arredor da gastronomía, o lecer e a convivencia.
A celebración dará comezo ás 14:00 horas co servizo do menú popular, no que o mexillón será o gran protagonista dunha xornada que busca reivindicar este produto e crear un espazo de encontro para desfrutar en familia ou con amizades.
A programación continuará durante toda a tarde con propostas dirixidas aos máis pequenos, que contarán con inchables e colchonetas gratuítas, mentres que ás 17:00 horas o Mago Paco ofrecerá o espectáculo Delicias, unha actuación chea de ilusión e humor pensada para público de todas as idades.
A música tamén terá un papel destacado nesta cuarta edición. Unha vez rematada a comida popular, o grupo Pekados será o encargado de poñer ritmo á sobremesa e prolongar o ambiente festivo nunha cita que combina tradición gastronómica e entretemento.
A organización anima á veciñanza e ás persoas que se atopen na comarca durante esa fin de semana a achegarse a Forxán para participar nun evento que continúa medrando edición tras edición e que xa se consolidou como unha das propostas estivais do municipio.