A federación veciñal Lucus Augusti pide que San Cibrao sexa Autoridade Portuaria

AMariñaXa

Desde a Federación de AA.

5 ene 2023

Desde a Federación de AA.VV. Lucus Augusti de Lugo, veñen de reivindicar e sumarse á campaña iniciada pola Confederación de Empresarios de Lugo -C.E.L.-, para que a provincia de Lugo, a través do Porto de San Cibrao, teña Autoridade Portuaria propia.

Na actualidade Lugo é a única provincia do conxunto de España que, tendo costa e Portos de Interese Xeral carece de Autoridade Portuaria propia, xa que oficialmente anexiónase ao Porto de Ferrol, constituíndo a Autoridade Portuaria de Ferrol – San Cibrao.

Cabe sinalar que, considerando por separado o tráfico de mercadorías do Porto de Ferrol, e o do Porto de San Cibrao, respectivamente, este último  ocuparía o segundo lugar nesta categoría entre todos os Portos de Galicia, unicamente por detrás do Porto da Coruña.

Ademais, en canto á actividade propia da Autoridade Portuaria de Ferrol – San Cibrao, o devandito Porto "representa o 60% do tráfico de mercadorías en toneladas do conxunto", din, "a reflexión ante esta realidade, é que o Porto de San Cibrao é unha infraestrutura infrautilizada, con concesión exclusiva para Alcoa, e aquí, a nosa petición de liberalización a este respecto".

"Non obviamos, tampouco, o feito de que San Cibrao posúe unha localización privilexiada e estratéxica para a entrada e saída de mercadorías cara a Portugal ou Centro Europa, a través da Autovía do Cantábrico. Circunstancia, esta, que consolidaría o seu valor, de facelo tamén o eixo ferroviario cara á Meseta Central -por Monforte de Lemos-", engaden.

Outro dato para ter en conta, é que San Cibrao constitúe o porto de maior calado da Mariña lucense. Este feito, permitiría que complementase ao Porto de Ribadeo -que xa move, na actualidade, entre 500.000 e 600.000 toneladas anuais de mercadoría-.

"Unha circunstancia que tampouco podemos esquecer, é que o Porto de San Cibrao podería ser a táboa de salvación que necesita na actualidade a Mariña lucense, converténdose no polo de desenvolvemento industrial que necesitamos. O Porto de San Cibrao sería excelente, pola súa localización e calado para o traslado de madeira, íquidos, fertilizantes, e un longo etcétera", din dende o colectivo lucense.

Desde a Federación de AA.VV. Lucus Augusti de Lugo, propoñen deseñar os pasos e accións necesarios para lograr este xusto obxectivo, que é que o Porto de San Cibrao sexa Autoridade Portuaria propia.