A Escola Municipal de Música e Danza de Ribadeo inicia o curso con 360 alumnos
A Escola Municipal de Música e Danza (EMMeD) de Ribadeo iniciou o curso 2026/2027 cunha matrícula próxima aos 360 alumnos e alumnas, unha cifra moi similar á rexistrada o ano pasado. Estes datos permiten ao centro manter a súa posición como a escola con maior número de estudantes da Mariña e do occidente de Asturias.
O novo curso conta cun equipo formado por 13 docentes, que se encargan de impartir as distintas especialidades musicais e de danza que ofrece a escola. O modelo de ensino aposta por unha atención próxima e especializada para cada estudante.
O responsable da EMMeD, Hugo García Presno, destaca que unha das claves do funcionamento da escola está na combinación entre a formación teórica e a práctica. "O éxito da Escola reside na combinación de teoría e práctica, no compromiso do profesorado e nun proxecto educativo que transcende a aula", sinala.
Neste sentido, explica que o obxectivo vai máis alá da aprendizaxe das diferentes disciplinas. "Queremos que o alumnado suba ao escenario, participe en actividades e sexa parte activa da vida cultural de Ribadeo", engade García Presno.
Ao longo dos próximos meses, a EMMeD continuará participando en diferentes eventos e colaboracións coa comunidade local. A intención é ofrecer ao alumnado oportunidades para amosar sobre os escenarios o traballo e os coñecementos adquiridos durante o curso.
"O noso obxectivo é que a música e a danza cheguen a toda a vila e sigan sendo unha ferramenta para educar en valores como a igualdade, a colaboración, o respecto ou a empatía", apunta o responsable da escola.
Desde a EMMeD tamén poñen en valor o apoio do Concello de Ribadeo e a implicación do equipo docente no desenvolvemento do proxecto educativo. "Sen eles, este proxecto non sería posible. É un traballo colectivo que se reflicte nos resultados e na confianza da veciñanza", conclúe García Presno.