Presentada a vixésimo primeira edición do Resurrection Fest nun acto na Deputación de Lugo
Os xardíns do Pazo de San Marcos acolleron a presentación da vixésimo primeira edición do Resurrection Fest, nun acto no que participaron o deputado de Promoción Económica e Social, Pablo Rivera Capón, e o representante da organización, Esteban Girón. O festival internacional de hardcore, metal e punk celebrarase do 1 ao 5 de xullo e contará un ano máis co apoio da Deputación de Lugo, que mantén un patrocinio de 150.000 euros e que respalda o evento desde a súa primeira edición.
Rivera Capón puxo en valor o crecemento do festival ao longo destes anos e a proxección internacional que lle deu á Mariña e á provincia de Lugo, lembrando tamén a figura do entón alcalde Melchor Roel, ao que atribuíu a capacidade de visualizar unha oportunidade onde outros vían incerteza. O deputado destacou ademais o impacto do Resurrection Fest como xerador de riqueza, emprego e actividade económica, especialmente nos sectores da hostalería, o comercio e os servizos, así como o compromiso da institución cun modelo de turismo sostible e baseado nas experiencias.
Segundo explicou Esteban Girón, esta edición prevé superar as 140.000 persoas asistentes ao longo dos catro días de celebración, cun cartel formado por arredor de 100 bandas internacionais que actuarán durante 12 horas diarias en catro escenarios. O campo de fútbol de Celeiro volverá converterse nun espazo central do festival, descrito como un pequeno parque temático.
O evento contará con público procedente de máis de 40 países e reforzará a súa dimensión global, con alta demanda internacional tanto de entradas como de aloxamento na comarca. Tamén se repetirá a iniciativa das vodas dentro do festival, que suma xa máis de 1.500 persoas inscritas, converténdose nun dos elementos máis singulares do Resurrection Fest a nivel europeo. O cartel estará encabezado por Iron Maiden, Marilyn Manson, Limp Bizkit, Sabaton, Anthrax, Trivium, A Day To Remember, Mastodon e Testament, entre outros nomes destacados do rock e do metal internacional.