A Deputación mantén o seu compromiso co financiamento da reforma do hangar de piragüismo do Club Altruán de Ribadeo
A vicepresidencia da Deputación de Lugo mantén o seu compromiso co financiamento da reforma e ampliación do hangar de piraguas da praia dos Bloques de Ribadeo.
O vicepresidente e deputado de Deportes Efrén Castro explicou que “se trata dun compromiso adquirido co goberno municipal de Ribadeo no pasado mandato, atendendo unha demanda histórica do Club Altruán” e remarcou “que mantemos o compromiso co financiamento destas obras que supuxeron unha renovación total das instalacións, que non contaban con servizos tan básicos como uns vestiarios en boas condicións”.
A área de Deportes achegará 74.200 euros á renovación das instalacións municipais, asumindo case integramente o custe das obras de reforma e ampliación, orzamentado en 75.000 euros.
O proxecto de reforma e ampliación do hangar de piraguismo supuxo unha renovación integral das instalacións nas que se reforzou a estrutura construtiva, se compartimentou o almacén de piraguas e se instalaron vestiarios.
A vicepresidencia da Deputación de Lugo tamén colaborou co Club Altrúan na adquisición dunha furgoneta multipraza, habilitada para acoplar un remolque, para facilitar o desprazamento de deportitas e embarcacións ás competicións.
O Altruán, que leva máis de 40 anos de actividade ininterrumpida en Ribadeo, conta con medio cento de piragüistas que nos últimos anos colleitaron importantes triunfos a nivel estatal e mesmo europeo; os últimos, as medallas de ouro e prata de Manuela Lastra, Elena Justo e Elena González Rico no Campionato de España Cadete.
Ademais, desenvolve unha intensa actividade na promoción do kaiak de mar non competitivo e no fomento de prácticas deportivas inclusivas.