A Deputación impulsa a mellora da mobilidade en Xove con novos investimentos en estradas
A Xunta de Goberno da Deputación de Lugo aprobou novos investimentos destinados a seguir mellorando a mobilidade na provincia, cunha actuación destacada no concello de Xove. No marco destas decisións, adxudicáronse as obras de mellora de tres estradas provinciais ao seu paso por este municipio mariñán, cun investimento total de 810.216 euros.
Os traballos foron asignados á empresa José No Mantiñán e Hijos Construcciones SA e forman parte do convenio de colaboración subscrito entre a Deputación de Lugo e o Concello de Xove para a cesión de dez estradas de titularidade provincial. Segundo o acordo, a institución provincial comprometeuse a executar actuacións de mellora en catro destas vías antes do seu traspaso definitivo ao ámbito municipal, sendo estas tres estradas as que veñen de ser adxudicadas.
No caso da LU-P-2601, a vía que conecta a estrada autonómica LU-862 co Portiño de Morás, actuarase nun tramo de algo máis de dous quilómetros, comprendido entre os puntos 2,850 e 5,285, o que permitirá deixar acondicionada practicamente a totalidade da estrada. Pola súa banda, na LU-P-2604, que enlaza a LU-862 con Valcarria por Monte, as obras centraranse nun tramo superior aos tres quilómetros, desde o inicio da vía ata o punto 3,140. A terceira actuación corresponde á LU-P-2605, entre A Tronca e Tarolo por Vila, onde se mellorará un treito de case tres quilómetros, tamén desde o comezo da estrada ata o punto 2,700.
As intervencións previstas inclúen a reapertura de cunetas, a pavimentación mediante aglomerado en quente e a renovación da sinalización horizontal e vertical, co obxectivo de incrementar a seguridade viaria e as condicións de circulación. Unha vez iniciadas as obras, o prazo de execución establecido será de seis meses.