Agro | Actualidade

A deputada de Promoción Económica e Social, Sonsoles López Izquierdo, presentou na Axencia de Colocación do Pazo de San Marcos, unha nova liña de formación para a reconversión profesional de 60 veciños en sectores produtivos da provincia que requiren de man de obra cualificada, como son no ámbito forestal e agrogandeiro. Así llo trasladaron á Responsable de Emprego as agrupacións profesionais destes sectores -Unións Agrarias, ASEFOGA e a Asociación Provincial de Empresarios da 1ª Transformación da Madeira de Lugo-.
López Izquierdo explicou que en Lugo existe unha necesidade de persoal cualificado nas empresas dos sectores forestal, silvícola e gandeiro, que hoxe en día non hai. Tendo en conta esta situación, o Goberno decidiu pór en marcha esta programación para dar resposta á necesidade do tecido empresarial, crear emprego no rural e buscar unha solución á problemática do relevo xeracional que existe nestes ámbitos profesionais. Trátase da liña de capacitación profesional do DesenvolvendORural, o plan de Deputación de 2,2 millóns de euros para xerar emprego e poñer en valor o rural.
Unha vez rematados os obradoiros, estableceranse bolsas de emprego dirixidas a estes participantes. Espérase acadar logo do proceso formativo unha inserción laboral, como mínimo, do 80% dos participantes.
3 obradoiros con 900 horas de formación
López Izquierdo destacou que con esta liña de formación gratuíta, ofreceranse case 900 horas de formación a través de 3 obradoiros, cunhas 20 prazas cada un. Serán impartidos por Unións Agrarias, ASEFOGA e a Asociación Provincial de Empresarios da 1ª Transformación da Madeira de Lugo, e terán lugar todos eles na cidade de Lugo nun horario de 9:00 a 14:00 horas. As persoas interesadas en participar nalgunha destas tres accións formativas poderán formalizar a súa inscrición a través da Axencia de Colocación da Deputación ata o vindeiro 30 de xaneiro. Os cursos son:
- Formación para granxas de leite e carne (Unións Agrarias). É un obradoiro que conta con 365 horas de formación coas que os participantes recibirán as competencias para traballar en granxas de leite e carne. Divídese en 4 eixos temáticos: manipulación de fitosanitarios, benestar animal, seguridade e saúde no traballo. Tamén se afondará na rutina e actividades específicas do día a día nas explotacións de vacún de leite.
- Formación básica forestal (ASEFOGA). Ofrece 200 horas de aprendizaxe para formar aos alumnos no ámbito do aproveitamento forestal. Engloba catro aspectos: método de repoboación, aspectos xerais da silvicultura, coidados culturais, seguridade e saúde no traballo, e as actividades específicas no desenvolvemento das labores nas explotacións forestais.
- Formación en transformación da madeira (Asociación Provincial de Empresarios da 1ª Transformación da Madeira de Lugo). Dispón de 300 horas de formación encamiñadas a dotar aos traballadores participantes de competencias xerais precisas para traballar en empresas de transformación. O aproveitamento dos produtos forestais, manexo de equipos, máquinas e ferramentas en condicións de seguridade ou prevención de riscos laborais, son só algúns dos ámbitos nos que se formarán os participantes.
DesenvolvendORural
Estas accións formativas constitúen a cuarta liña de actuación do programa DesenvolvendORural, o 1º Plan de desenvolvemento integral da provincia. Trátase dun pioneiro plan, dotado de 2,2 millóns de euros, co que o Executivo da Deputación muda a súa política de emprego, dirixíndoa a promoción económica e social para impulsar e poñer en valor o rural lucense. Busca cumprir 2 obxectivos a longo prazo: xerar emprego e fixar poboación na provincia. Está composto por 4 liñas básicas de acción: tecendo emprego, plan de 1ª oportunidade, premios ao emprendemento rural e capacitación profesional.