A Deputación adianta a roza das estradas provinciais en Viveiro antes do inicio do verán
A Deputación de Lugo completou practicamente na súa totalidade os traballos de limpeza e roza das estradas provinciais ao seu paso polo concello de Viveiro, cumprindo así o compromiso de adiantar este ano estas actuacións para que a rede viaria estivese preparada antes da chegada do período de maior afluencia de vehículos.
A 1 de xullo, a maior parte das vías provinciais do municipio presentaban xa un estado óptimo tras a execución destas tarefas de conservación, que teñen como principal finalidade mellorar a visibilidade dos condutores, incrementar a seguridade viaria e facilitar unhas condicións de circulación máis axeitadas tanto para a veciñanza como para as persoas que visitan a localidade durante os meses de verán.
Entre as estradas nas que xa se realizaron estes traballos figuran a de San Roque, a que comunica o cemiterio coas Nogueiras, a da Fonte de Santa Ana de Magazos, a de San Pedro e Valcarría en dirección a Xove, a de Galdo, o acceso á praia de Area, a estrada de Vieiro ou a que enlaza con Suegos pola Patarroa, entre outras.
A institución provincial destaca que este calendario supón un adianto significativo respecto a campañas anteriores, nas que estas actuacións se prolongaban durante boa parte do verán. Nesta ocasión, a planificación previa e a coordinación dos servizos permitiron que a maioría dos traballos estivesen finalizados ao comezo de xullo, coincidindo co incremento do tráfico propio da tempada estival.
A presidenta da Deputación de Lugo, Carmela López Moreno, sinalou que este avance responde ao compromiso adquirido de acelerar as tarefas de mantemento da rede provincial, incidindo en que a conservación das estradas é unha prioridade para a institución, tanto pola súa incidencia na seguridade como pola mellora da mobilidade e da imaxe que ofrece o territorio nun período de especial importancia para o turismo.
Desde a Deputación subliñan que cumprir cos prazos previstos e responder ás necesidades dos concellos forma parte da súa política de xestión, co obxectivo de manter a rede viaria provincial nas mellores condicións posibles e ofrecer un servizo de calidade á cidadanía.