A cultura caboverdiana enche de música e solidariedade a Praza de Abastos de Burela
A Praza de Abastos de Burela converterase este sábado 4 de xullo nun punto de encontro arredor da cultura caboverdiana coa celebración dunha festa benéfica polo Día da Independencia de Cabo Verde. A cita desenvolverase entre as 12.00 e as 21.00 horas e reunirá música, gastronomía, artesanía, baile tradicional e propostas para toda a familia.
A iniciativa está organizada pola Asociación Rabentola, o Concello de Burela, o Grupo Convivencia Entre Nós e Djunta Mo, co obxectivo de compartir coa veciñanza unha xornada de convivencia e recoñecemento á comunidade caboverdiana, moi presente na vida social e cultural do municipio.
A programación contará coas actuacións do Grupo Batuko Tabanka, Grupo Raízes Peruano, Grupo Senegal, Alex Djimi, Grupo Dancarina Minis de Santiago e Jelson Gaita e Ocla Baixa. Ademais, Djunta Mo instalará un posto con produtos artesanais e típicos, do que destinará o 15 % da recadación a unha causa solidaria.
O evento terá tamén un marcado carácter benéfico, xa que buscará recadar apoio para Ludmila, que viaxará desde Portugal para participar na celebración.
O tenente de alcaldesa de Burela, Mario Pillado, destacou a importancia desta data para o municipio e lembrou que a comunidade caboverdiana forma parte da historia e do día a día da localidade. O edil sinalou que esta celebración é xa unha expresión da identidade compartida de Burela.