Sanidade

O sindicato atribúe a medida á falta de planificación e advirte de máis derivacións, listas de espera e dificultades para pacientes e profesionais

A CIG-Saúde expresou o seu rexeitamento á decisión de pechar 36 camas no Hospital da Mariña durante os meses de xullo, agosto e setembro. A organización sindical considera que a medida non responde a necesidades asistenciais nin a criterios técnicos, senón que forma parte dunha estratexia de redución de recursos que, ao seu xuízo, afecta á calidade da atención sanitaria na comarca.

Desde a central sindical sosteñen que a explicación ofrecida pola dirección do centro, baseada na falta de persoal de enfermaría, é consecuencia dunha política de contratación que veñen cuestionando desde hai anos. Segundo indican, a ausencia de condicións laborais estables provocou que numerosos profesionais optasen por desenvolver a súa carreira noutras comunidades autónomas onde atopan maior seguridade laboral e mellores perspectivas de futuro.

A CIG-Saúde lembra que leva tempo reclamando contratos máis estables, con planificación definida e maiores garantías para o persoal. O sindicato considera que a perda de profesionais non responde a cuestións persoais, senón ás condicións laborais existentes, polo que responsabiliza á dirección da situación actual.

Entre as consecuencias que prevé a organización figura un aumento das derivacións de pacientes ao Hospital Universitario Lucus Augusti (HULA), especialmente nos momentos de maior ocupación. Ademais, alerta de que a redución da capacidade asistencial pode contribuír a incrementar as listas de espera e favorecer o traslado de pacientes á sanidade privada para cumprir os prazos establecidos pola Lei de Garantías.

O sindicato tamén advirte das repercusións que esta decisión pode ter sobre o persoal sanitario. Segundo explica, moitos traballadores e traballadoras poderían verse obrigados a cambiar de servizo ou unidade durante o verán, alterando a planificación laboral e persoal que tiñan prevista para os próximos meses.

A organización lembra que o período estival coincide cun importante aumento da poboación na comarca, especialmente nos concellos costeiros, que reciben milleiros de visitantes. Por este motivo, considera que a demanda asistencial non diminúe durante estas datas e defende que os recursos sanitarios deben manterse para garantir unha atención adecuada á cidadanía.

A CIG-Saúde conclúe que a redución de camas hospitalarias non supón unha mellora na xestión do sistema sanitario, senón unha medida orientada ao aforro económico que, segundo sostén, repercutirá negativamente tanto nos pacientes como nos profesionais do Hospital da Mariña.