A ciencia forestal abrirá As Quendas 2026 coa voz de María Josefa Lombardero
As Quendas 2026 xa teñen pregoeira. A organización da festa anunciou que a encargada de dar comezo á celebración será a mindoniense María Josefa Lombardero Díaz, coñecida como Fina, un nome ligado á investigación universitaria e ao estudo da saúde dos montes.
Doutora en Ciencias Biolóxicas e catedrática da Universidade de Santiago de Compostela, Lombardero desenvolve a súa actividade académica e investigadora no ámbito da sanidade forestal, a dinámica das poboacións de insectos forestais, os sistemas alternativos de control de pragas e as defensas da arborado fronte ao cambio climático.
O seu nome chega ao pregón cun perfil vencellado ao coñecemento científico e á protección do territorio, nun momento no que a saúde forestal e a sustentabilidade teñen un peso crecente no debate público. A súa traxectoria inclúe tamén colaboracións internacionais, entre elas traballos con investigadores da Northern Arizona University.
A elección de María Josefa Lombardero sitúa así a investigación e o compromiso co medio natural no arranque dunha das citas máis tradicionais do calendario festivo mindoniense. As Quendas celebraranse este ano do 30 de abril ao 3 de maio e volverán converter Mondoñedo nun punto de encontro arredor da tradición, a cultura popular e o ambiente festivo.