A Autoridade Portuaria de Ferrol rexistra 5,3 millóns de toneladas de tráfico nos nove primeiros meses do ano
A Autoridade Portuaria de Ferrol-San Cibrao mantén a tendencia positiva no balance de tráfico. Nos nove primeiros meses deste ano, nos peiraos de Ferrol e San Cibrao movéronse un total de 5.296.854 toneladas fronte ás 5.129.492 do mesmo período do ano anterior, é dicir, 167.362 toneladas máis. Isto supón un crecemento do 3,26 %, o que implica manter unha tendencia positiva nun contexto de incerteza internacional que afecta ao transporte marítimo.
O incremento é especialmente significativo nos graneis líquidos. Entre o 1 de xaneiro e o 30 de setembro de 2026 movéronse 2.298.296 toneladas de graneis líquidos fronte ás 1.747.493 do mesmo período de 2025. Isto supón 550.803 toneladas máis, é dicir, un incremento do 31,52 %, co gas natural e o fuel oil como principais tráficos. Este incremento dos líquidos permite paliar o descenso que se rexistra de novo nos sólidos, que baixan un 12,57 % e contabilizan un movemento de 2.322.455 toneladas.
A mercadoría xeral, pola súa banda, alcanza as 676.102 toneladas movidas nos nove primeiros meses do ano fronte ás 725.586 do mesmo período de 2025. As tensións xeopolíticas afectan especialmente a este segmento do tráfico e, en particular, á mercadoría contenerizada. Na terminal de Yilport movéronse ata o 30 de setembro 8.093 TEU (104.843 toneladas).