A Aula de Teatro Municipal de Ribadeo estrearase na Festa das Cruces da Ponte de Arante
A Aula de Teatro Municipal de Ribadeo vivirá o seu primeiro gran acto público o vindeiro 24 de maio coincidindo coa celebración da Festa das Cruces na Ponte de Arante. O grupo participará na recreación da Batalla da Ponte, unha das actividades máis destacadas da cita festiva e histórica que cada ano reúne a numerosos asistentes arredor deste episodio vinculado á Guerra da Independencia.
A concelleira de Cultura, Begoña Sanjurjo, explicou que esta iniciativa botou a andar o pasado mes de marzo impulsada pola Área de Cultura do Concello. Segundo destacou, trátase da primeira vez que Ribadeo conta cunha Aula de Teatro Municipal, un proxecto que naceu coa intención de fomentar as artes escénicas e ofrecer un novo espazo de formación e creación cultural.
Sanjurjo mostrou a súa satisfacción pola resposta obtida desde a posta en marcha da actividade, na que participa un grupo formado por persoas de diferentes idades. Durante estes meses, os integrantes da aula estiveron traballando aspectos como a expresión corporal, a vocalización e outras técnicas necesarias para a interpretación teatral, guiados por Rubén Pérez e Daniel Vázquez.
O debut sobre o escenario producirase no marco da recreación histórica da Batalla da Ponte, na que os participantes darán vida a diferentes escenas relacionadas coa loita contra as tropas francesas. Ademais da representación principal, tamén se incluirán referencias a outros episodios históricos ligados á Ponte de Arante e ao paso do Camiño de Santiago por esta zona.
Na actividade tamén participarán Luis Iglesias e o bruxo Queiman, figuras habituais neste tipo de representacións históricas e culturais. A representación desenvolverase na tarde do domingo 24 de maio dentro do programa da Festa das Cruces.
Desde o Concello animan á veciñanza e aos visitantes a achegarse ata a Ponte de Arante para apoiar aos novos actores e actrices nesta primeira experiencia pública dunha iniciativa que busca consolidarse dentro da programación cultural ribadense.