Sociedade | Medio ambiente

A xornada enmarcouse no Plan de Acción de Alcoa e contou coa participación de persoas voluntarias, ás que a alcaldesa, Dolores García Caramés, agradeceu a súa colaboración

A praia de Cubelas acolleu unha nova xornada de limpeza impulsada pola asociación Mistura de Lieiro para contribuír á conservación do litoral de Cervo. A iniciativa forma parte do Plan de Acción de Alcoa, que promove a colaboración entre as entidades sociais e o voluntariado para coidar os espazos naturais do municipio.

Os traballos centráronse na retirada de residuos e na mellora das condicións deste areal, co propósito de favorecer a conservación do medio natural e manter o entorno costeiro limpo e coidado.

A alcaldesa de Cervo, Dolores García Caramés, achegouse ata a praia para acompañar as persoas participantes e agradecer tanto á asociación Mistura de Lieiro como ao voluntariado a súa implicación nesta actividade.

A iniciativa pon de manifesto o papel da colaboración cidadá na protección dos espazos naturais e na conservación do patrimonio ambiental do municipio.