A alcaldesa de Cervo pide á Deputación que asuma a ampliación e a xestión do Museo do Mar de San Cibrao
O Museo do Mar de San Cibrao podería afrontar unha nova etapa cunha ampliación e un modelo de xestión unificado. O Concello de Cervo aprobou por unanimidade no pleno municipal unha proposta para solicitar á Deputación de Lugo que asuma tanto a execución desta actuación como a xestión do complexo museístico.
A iniciativa busca integrar as instalacións actuais e a futura ampliación nun único equipamento, cun funcionamento coordinado que permita evitar duplicidades e aproveitar os recursos públicos de maneira eficiente. O museo é un espazo de referencia para a conservación e difusión do patrimonio histórico, cultural e mariñeiro de San Cibrao.
Para facilitar o proxecto, o Concello lembra que nos últimos anos impulsou diferentes actuacións, entre elas a adquisición de terreos anexos ao museo. Ademais, ofrece ceder á Deputación a edificación contigua situada nesa parcela para que a institución provincial poida acometer a ampliación e asumir a xestión do conxunto.
Pola súa banda, o goberno local prevé executar con fondos propios a humanización da contorna do museo, co obxectivo de mellorar o espazo e a súa integración no núcleo urbano de San Cibrao.
O Concello reclama abrir unha vía de diálogo
A alcaldesa de Cervo, Dolores García Caramés, pide á Deputación que dea cumprimento ao acordo plenario e abra unha vía de diálogo para concretar os próximos pasos. A rexedora defende que a ampliación e a xestión unificada permitirían dotar o museo dunha planificación común e adaptada á relevancia do patrimonio marítimo do municipio.
O acordo aprobado reclama tamén que ambas as administracións definan a fórmula xurídica e administrativa máis axeitada para facer efectiva a colaboración. O Concello agarda que o respaldo unánime da Corporación facilite avanzar nunha solución que permita materializar a ampliación e garantir o futuro do Museo do Mar como referente cultural e patrimonial de Cervo.