A Agrupación Cultural Francisco Lanza percorre As Pontes, Pontedeume e Sobrado dos Monxes
A Agrupación Cultural Francisco Lanza (ACFL) de Ribadeo realizou unha viaxe cultural por As Pontes, Pontedeume e Sobrado dos Monxes, cun itinerario que combinou historia, arquitectura e patrimonio galego.
A primeira parada foi nas Pontes, onde os participantes contemplaron o lago e lembraron a transformación industrial da localidade nas últimas décadas. A continuación, o grupo desprazouse ata Pontedeume para afondar na historia da vila e na relevancia da liñaxe dos Andrade, unha familia nobiliaria que tivo un papel destacado na historia de Galicia.
A viaxe continuou pola tarde no mosteiro de Sobrado dos Monxes, onde os asistentes puideron coñecer a riqueza do patrimonio vinculado á orde do Císter e as características do barroco galego. Durante a visita, tamén tiveron a oportunidade de escoitar parte dunha mostra de música coral que se estaba a celebrar no recinto monástico.
A agrupación agradeceu as explicacións de Enrique Campos, secretario da ACFL, durante as visitas ás Pontes e ao mosteiro de Sobrado dos Monxes. Así mesmo, destacou as achegas de Celia Castro sobre a arquitectura e a arte medievais, así como sobre a historia e a vida da orde cisterciense.
Con esta saída, a entidade ribadense continuou a súa aposta polas actividades culturais que permiten descubrir e comprender o patrimonio histórico e artístico de Galicia.