A AC Osorio Gutiérrez celebra en Lourenzá os seus 40 anos cunha xornada de música e tradición
A Asociación Cultural Osorio Gutiérrez conmemorará este sábado, 10 de outubro, os seus 40 anos de traxectoria cunha xornada especial no Multiúsos Ponte de Cuñas de Lourenzá. A celebración reunirá diferentes propostas culturais e musicais pensadas para públicos diversos, cunha programación que comezará ás 18.00 horas e terá entrada gratuíta.
A primeira actividade será unha sesión de títeres titulada "Vacacións no mar", prevista para as 18.00 horas. Unha hora máis tarde, ás 19.00, será a quenda dun obradoiro de danza urbana, que permitirá aos asistentes achegarse a esta disciplina.
A programación continuará ás 20.30 horas coa actuación de Macacos e Rechouchíos. Ás 21.00 horas tomará o relevo o grupo MPlan, mentres que a partir das 22.00 horas será a quenda da Banda de Música de Foz, que pechará o programa musical da xornada.
Ademais das actividades previstas no escenario, a organización habilitará un servizo de barra e comida a prezos populares para acompañar a celebración ao longo da tarde e da noite.
A xornada servirá así para poñer en valor as catro décadas de actividade da AC Osorio Gutiérrez e a súa contribución á conservación e difusión da música, a cultura e as tradicións. O Concello de Lourenzá trasladou as súas felicitacións á entidade por este aniversario e animou á veciñanza a participar nesta celebración.
A actividade está organizada pola AC Osorio Gutiérrez coa colaboración do Concello de Lourenzá e a Deputación de Lugo.
⇒REPORTAXE
