Xove conclúe a campaña de árbores autóctonas coa entrega dos pedidos á veciñanza
A Concellería de Agricultura do Concello de Xove porá este martes 10 de febreiro o punto final á campaña municipal de árbores autóctonas, forestais e plantas de xardín coa entrega dos pedidos realizados pola veciñanza. A xornada de repartición desenvolverase entre as 10.00 e as 13.00 horas no local anexo ao bar A Cívica, na praza do Centro Cívico.
A campaña correspondente á tempada 2025/2026 estivo activa durante os meses de novembro e decembro do pasado ano, tempo no que se abriu o prazo para que a cidadanía puidese solicitar exemplares vexetais de interese local. Segundo explicou a Concellería, nesta edición rexistrouse un menor número de solicitudes respecto a anos anteriores, aínda que cun volume máis elevado por pedido.
Entre as especies máis demandadas destacaron as árbores froiteiras, un dato que, segundo o Concello, reflicte unha evolución nas preferencias da veciñanza cara a plantacións máis produtivas, sen perder de vista a importancia da conservación das especies autóctonas e do medio natural.
Con esta entrega péchase oficialmente unha campaña que permite facer chegar os exemplares solicitados ás persoas participantes e que reforza o compromiso municipal coa sustentabilidade ambiental. Desde a Concellería de Agricultura quixeron agradecer a colaboración da veciñanza e a súa implicación na protección do entorno e no impulso dun modelo de xestión máis responsable dos recursos naturais.