Xove activa o programa ‘Concilia Verán 2025’ para facilitar a vida ás familias durante as vacacións escolares
O Concello de Xove pon en marcha unha nova edición do programa ‘Xove Concilia Verán’, unha iniciativa pensada para axudar ás familias durante os meses de vacacións escolares, ofrecendo un espazo seguro e lúdico para os máis pequenos. O servizo funcionará dende o 23 de xuño ata o 5 de setembro de 2025, e está dirixido a nenos e nenas de entre 3 e 10 anos de idade.
Trátase dunha proposta promovida pola Área de Muller e Igualdade do Concello de Xove, coa colaboración da Xunta de Galicia, o Goberno de España e o Plan Corresponsables, que busca facilitar a conciliación da vida laboral e familiar ao tempo que se fomenta o xogo, a aprendizaxe e a socialización da infancia.
As actividades desenvolveranse nun ambiente divertido, dinámico e adaptado ás necesidades das diferentes idades, garantindo así unha experiencia enriquecedora para os rapaces e tranquilidade para os pais e nais.
As inscricións estarán abertas ata o 7 de xuño, podendo realizarse presencialmente na OMIX (Oficina Municipal de Información Xuvenil). O número de prazas é limitado, polo que dende o Concello recomendan realizar a inscrición o antes posible para asegurar a participación.
Este programa estival consolídase como unha ferramenta imprescindible para moitas familias da contorna, que atopan nesta iniciativa unha axuda fundamental para compatibilizar o traballo co coidado dos fillos e fillas durante o verán.