Xove acollerá o XIII Encontro de Palilleiras 'Coas Nosas Mans' o 5 de outubro
O Concello de Xove celebrará o vindeiro sábado, 5 de outubro, o XIII Encontro de Palilleiras "Coas Nosas Mans". Ata o momento, xa se rexistraron máis de 150 palilleiras procedentes das catro provincias galegas e de Asturias. Entre as inscricións destacan varias mozas menores de 15 anos e un mozo, o que reflicte a esperanza de renovación xeracional e o avance na superación dos estereotipos que asocian a costura e o bordado exclusivamente coas mulleres.
No que respecta aos postos de venda, xa se superaron os 20 expositores, estando a piques de pechar as inscricións por falta de espazo. Para aquelas asociacións que desexen participar, o prazo de inscrición remata o 30 de setembro, podendo realizarse a través do teléfono do Concello de Xove, 982 592001.
O evento contará, como en anos anteriores, cunha ampla participación e unha grande oferta de produtos relacionados co oficio artesanal do palillo.