Xove acollerá o I Duatlón Escolar como clasificatorio provincial de Lugo
O Concello de Xove será o escenario do I Duatlón Escolar, unha proba deportiva destinada a mozos e mozas das categorías benxamín, alevín, infantil e cadete. O evento, programado para o domingo 2 de marzo de 2025, servirá como clasificatorio provincial de Lugo dentro do programa Xogade, promovido pola Xunta de Galicia e a Federación Galega de Tríatlon (FEGATRI).
A competición, que combina carreira a pé e ciclismo, celebrarase en diferentes quendas segundo a idade dos participantes. A primeira saída será ás 11:00 horas para a categoría benxamín (2016-2017), seguida dos alevíns (2014-2015) ás 11:35 horas. Os infantís (2012-2013) entrarán en competición ás 12:25 horas, mentres que os cadetes (2010-2011) pecharán a xornada ás 13:30 horas.
A inscrición é gratuíta e permanecerá aberta ata o 25 de febreiro ás 14:00 horas. As persoas interesadas poden anotarse enviando un correo electrónico a fegatrit@gmail.com con copia a deportes.lugo@xunta.gal.
O evento conta co apoio da Xunta de Galicia, Deporte Galego e o Concello de Xove, consolidando así o seu compromiso co fomento do deporte en idade escolar.