Xogos populares, desembarco e xuízo popular na XXXVII Festa da Maruxaina
![presentación_programa_maruxaina](https://amarinaxa.com/wp-content/uploads/2024/08/presentacion_programa_maruxaina-1.jpg)
O Concello de Cervo organizará a XXXVII Festa da Maruxaina o sábado 10 de agosto. A cita foi presentada pola rexedora, Dolores García Caramés, os concelleiros Mali Méndez, Alfredo Fernández e Adrián Arias, e por unha representación da asociación Amigos da Maruxaina, que se encarga da pre-maruxaina, e tamén do xuízo a medianoite e representantes da asociación a Anxuela.
Na festa tamén colaboran Mar de San Ciprián, que organizará os Xogos Populares na Praia, e Mulleres de San Ciprián, que colabora na venta das tazas e das camisetas personalizadas na caseta que se instalará na Praza dos Campos. Ese día 10 serán os actos centrais, pero xa o venres terá lugar a Pre-Maruxaina co gran chupinazo ás 19.00 horas na Praza Nardo Martíndez, seguido da concentración de Maruxainos e Maruxainas, onde haberá degustación de empanadas típicas galegas e bolos preñados.
Ás 21.00 horas está previsto o nomeamento do Maruxaino ou Maruxaina de Honra 2024, a cargo da Asociación Amigos da Maruxaina. Xa o sábado, 10 de agosto, será o día grande, que estará animado desde primeira hora polo ritmo de diferentes charangas e gaiteiros. Ás 11.00 horas será o chupinazo e a xuntanza de Maruxainos e Maruxainas está prevista para as 12.00 horas, na Praza Nardo Martínez, que iniciarán o paseo polas rúas do pobo ao son das gaitas e os cornos.
Ás 12.30 horas arrincará o ritmo das charangas que percorrerán San Cibrao durante todo o día. Nesta ocasión serán a Charanga Carmiña, a Charanga Tambukada, a Louband Street Band e Mekánika Rolling Band. Á tardiña, ás 18.30 horas, están previsto o inicio dos xogos populares na Praia do Torno, organizados por Mar de San Ciprián coa colaboración do Concello.
Xa ás 23.00 horas será o desembarco da Maruxaina na Praia do Torno. Durante o traxecto as persoas asistentes poderán gozar dun espectáculo de fogos de artificio. Ás 00.00 horas será o gran xuízo popular, organizado por Amigos da Maruxaina, amenizado polo grupo folklórico Mistura, seguido dunha degustación de balde de queimada na Praza dos Campos.
A continuación, haberá verbena coas orquestras Arizona e Kalima 3.0. Desde o Concello de Cervo animan a veciños e visitantes a desfrutar desta Festa declarada de Interese Turístico Galego, que é un reflexo da conexión histórica de San Ciprián co mar, sempre avogando por unha celebración na que a diversión sexa o máis sá e harmónica posible, mantendo o espírito orixinal da festa.