Ximnasia activa en Burela para fomentar o envellecemento saudable
O Concello de Burela, a través das delegacións de Deportes e Servizos Sociais, vén de anunciar unha nova edición do programa Ximnasia activa, pensado para favorecer o envellecemento saudable das persoas maiores de 60 anos. As sesións desenvolveranse na Praza de Abastos e inclúen exercicios físicos adaptados, xogos de grupo e diversas actividades co obxectivo de mellorar a mobilidade, reforzar a saúde e fomentar a convivencia.
As inscricións estarán abertas do 9 ao 19 de setembro na Casa do Concello, en horario de 9:00 a 14:00 horas. Os interesados poderán escoller entre diferentes grupos de luns a xoves, con horarios de mañá que se distribúen entre as 9:45 e as 12:45 horas, permitindo así unha ampla participación.
Desde o goberno local subliñan que esta iniciativa, enmarcada dentro da Estratexia de Promoción da Saúde e Prevención no SNS, busca tamén combater o sedentarismo e potenciar a vida activa, ao tempo que se converte nun espazo de encontro social. “Queremos que os maiores de Burela teñan unha oportunidade de gozar do exercicio, de coidar a súa saúde e de compartir momentos nun ambiente positivo e enriquecedor”, destacan.