Volve a Ruada de Contos de Viveiro
![Cartel Ruada de Contos](https://amarinaxa.com/wp-content/uploads/2023/07/Cartel-Ruada-de-Contos.jpg)
O Concello de Viveiro organiza unha nova edición da Ruada de Contos, un evento xa consolidado no verán para a cativada viveirense.
Con esta iniciativa, o Concello busca, en palabras da concelleira Lara Fernández Fernández-Noriega, "poñer en valor un sitio tan emblemático e tan bonito como é o parque Pernas Peón", onde terán lugar os contacontos. En caso de choiva, serán na Sala Multiusos do Concello.
A Ruada de Contos desenvolverase ao longo de tres xornadas, sempre no parque Pernas Peón. A primeira será o xoves 20 de xullo ás 19:30, na que Inventi Teatro representará 'As palabras perdidas'.
A segunda xornada será á semana seguinte, o xoves 27 de xullo, tamén ás 19:30. Será a quenda de 'RillaRilla', a cargo de Xarope Tulú. Finalmente, a Ruada de Contos rematará o xoves 10 de agosto ás 19:30 con 'As Minas do rei Salomón', de Ghazafelhos.
"Esperamos que a edición deste ano sexa do agrado da cativada de Viveiro", indica Fernández Fernández-Noriega.
![Cartel Ruada de Contos](https://amarinaxa.com/wp-content/uploads/thumbs/2023/07/Cartel-Ruada-de-Contos-200x279.jpeg)