Volve a cultura ecuestre do San Rosendo en San Miguel de Reinante
San Miguel prepárase para celebrar a Festa de San Rosendo 2025 cunha ampla programación do 28 de febreiro ao 2 de marzo. O evento, que combina tradición, cultura e gastronomía, contará con música, exhibicións ecuestres, feira de gando e artesanía, degustacións gratuítas e actividades para todas as idades.
O venres 28 de febreiro ás 20:00 horas terá lugar a II Degustación gratuíta de poldro de cabalo PRG 100% raza autóctona nos bares de San Miguel. O sábado 1 de marzo a programación inclúe a misa solemne ás 13:00 horas, seguida ás 13:45 da actuación da sección infantil de O Arco da Vella e sesión vermú co grupo Escolma de Meus. Pola tarde, ás 16:00 horas, celebrarase un Aberto de Billarda no campo da festa, mentres que ás 20:00 horas repetirase a degustación gratuíta de poldro de cabalo nos bares. A xornada rematará cunha verbena ás 22:00 horas a cargo da orquestra Los Satélites.
O domingo 2 de marzo abrirase a feira de gando ás 09:30 horas e a feira de artesanía ás 10:30. Á mesma hora, desenvolverase o concurso morfolóxico cabalar oficial de Pura Raza Galega, puntuable para o campionato galego. Ás 12:00 terá lugar unha demostración de pastoreo con cans Border Collie organizada por Ovica, seguida ás 12:30 polo concurso morfolóxico de cabalos de monte en corraletas. Ás 13:00 horas celebrarase a misa solemne e ás 13:45 unha sesión vermú co grupo folk Ardentía. A entrega de premios da feira de gando e dos concursos PURAGA será ás 14:45 horas. Pola tarde, ás 16:30 horas, repetirase a demostración de pastoreo con Border Collie, e ás 17:00 horas celebrarase unha xincana con xogos ecuestres.
Durante os dous días, haberá servizo de polbería a cargo de A Rochela e a festa contará cunha carpa cuberta para garantir o desenvolvemento das actividades en caso de mal tempo. Ademais, na feira de gando poderán participar todas as persoas que o desexen, sempre cumprindo as normas establecidas para a seguridade dos animais. O evento tamén incluirá concursos morfolóxicos e de habilidades ecuestres, con 2.000 euros en premios. Con esta programación variada, San Miguel aposta por manter viva a súa tradición festiva e converter esta celebración nun punto de encontro imprescindible na comarca.