Viveiro reforza o seu compromiso coa limpeza e lembra as sancións por verteduras ilegais
No marco do seu compromiso cunha vila máis limpa e respectuosa co medio ambiente, o Concello de Viveiro fai un chamamento á veciñanza para facer un uso axeitado dos espazos habilitados para a xestión de residuos. A alcaldesa, Mariña Gueimunde, insistiu na importancia de empregar o Punto Limpo para o depósito de residuos especiais e lembrou que «as empresas deben contar con xestores autorizados para tratar os seus refugallos».
Gueimunde amosou a súa preocupación pola aparición de verteduras incontroladas en diferentes zonas do ámbito rural, así como polo depósito de restos de poda na parcela das Nogueiras, un espazo recentemente rexenerado polo Concello.
A rexedora lembrou que a nova Ordenanza de Convivencia, Limpeza e Residuos contempla sancións económicas segundo a gravidade das infraccións. Así, as faltas leves poderán supoñer multas de entre 50 e 750 euros; as graves, entre 751 e 1.500 euros; e as moi graves, de 1.501 a 3.000 euros.
Co obxectivo de facilitar o correcto tratamento dos residuos, o Punto Limpo de Patarrosa-Escourido está dispoñible para a veciñanza no seguinte horario:
Luns: de 8:00 a 14:00 e de 15:00 a 19:00 h
Martes e xoves: de 9:00 a 13:00 e de 15:00 a 19:00 h
Mércores e venres: de 8:00 a 14:00 h
Sábados: de 10:00 a 13:00 h (agás o cuarto sábado de cada mes, que permanece pechado)
Ademais, o Concello ofrece un servizo gratuíto de recollida de voluminosos, como mobles ou electrodomésticos, que se pode solicitar a través do teléfono 697 162 637.
A alcaldesa conclúe lembrando que a colaboración cidadá é esencial para manter un Viveiro limpo, sostible e coidado.