Viveiro organiza un obradoiro de ciberseguridade para pemes e autónomos
O Concello de Viveiro pon en marcha un obradoiro presencial centrado na ciberseguridade dirixido a pemes, persoas autónomas e a calquera interesado en reforzar a súa protección no ámbito dixital. A actividade, titulada “Ciberseguridade para pemes e persoas autónomas: O poder das persoas”, terá lugar o martes 10 de febreiro na Aula CeMIT de Viveiro, situada nos Claustros de San Francisco, en horario de 10:00 a 12:00 horas.
Durante o obradoiro, os asistentes aprenderán a identificar riscos en liña, recoñecer correos electrónicos fraudulentos e manter seguras as súas credenciais e dispositivos electrónicos. Desde o Concello destacan que a formación é práctica e orientada a ofrecer ferramentas útiles para protexer as pequenas empresas e os profesionais autónomos fronte ás ameazas dixitais.
As persoas interesadas poden reservar a súa praza a través da páxina oficial do CeMIT: Solicitar praza. Os organizadores animan a participar para adquirir coñecementos que permitan aumentar a seguridade e a confianza no uso das tecnoloxías dixitais.