Viveiro distingue o talento literario galego na entrega dos Premios Vilar Ponte 2025
O Concello de Viveiro celebrou a entrega da sétima edición do certame de novela Vilar Ponte, unha convocatoria consolidada no panorama literario galego que conta tamén co apoio da Consellería de Cultura, Lingua e Xuventude. A cita reafirmou a vontade do municipio por promover a diversidade creativa e poñer en valor o peso da narrativa contemporánea escrita en galego.
A obra gañadora desta edición foi A dous pasos do Edén, da escritora Pura Salceda. Filla de emigrantes galegos, residente en Barcelona e cunha ampla traxectoria académica —é licenciada en Filoloxía Hispánica e doutora en Filoloxía Románica—, Salceda conta con títulos publicados en galego, castelán e catalán. O xurado salientou da súa novela “a habelencia para mergullarnos no límbico mundo hospitalario no que se move o protagonista, un paciente en diálise que rememora unha intensa vida amatoria mentres cruza o seu camiño cunha miríade de personaxes cos que coincide nas sesións de tratamento”. Na acta recóllese que se trata dunha narración “na que vidas diversas converxen nun purgatorio de salas de hospital, onde se tecen redes de amizade e afectos que fan fortes a estes seres fronte ao horizonte dun final ameazante”.
Como finalista resultou elixida Vera, de Ignacio Vidal Portabales, profesor da USC e autor recoñecido con galardóns como o Blanco Amor, o García Barros ou o Simbad. O tribunal puxo en valor “a súa capacidade para introducirnos na vida dunha muller que fica soa cando o seu home marcha de cooperante a África”, así como “a orfandade sobrevida, as dificultades no trato familiar e social e a dubidosa esperanza dun futuro incerto que gravitan no corazón desta historia fondamente emocional, inzada de ocultas perdas e inesperadas lumieiras”.
O xurado estivo composto por Carlos Nuevo Cal, cronista oficial de Viveiro, profesor e historiador; Rosalía Morlán Vieites, escritora e enfermeira; e Armando Requeixo Cuba, investigador, profesor e crítico literario. Como secretaria actuou M. Rosario San Isidro Franco, traballadora do Concello de Viveiro, con voz pero sen voto, encargada de levantar acta da sesión.
Coa entrega desta nova edición, os Premios Vilar Ponte reafirman o seu compromiso coa creación literaria e co recoñecemento dun talento que segue a enriquecer o patrimonio cultural galego.