Viveiro clausura o proxecto de reforzo educativo e lecer destinado a menores en situación de desvantaxe
O Concello de Viveiro, a través da Oficina Municipal de Voluntariado, puxo o punto final o pasado venres 22 de agosto ao Proxecto de Reforzo Educativo, lecer e tempo libre, unha proposta social e educativa orientada a nenos e nenas en situación de desvantaxe. O acto de clausura celebrouse na Sala Multiúsos do Concello, onde participantes, voluntariado e persoal técnico compartiron un pequeno petisco de despedida.
O programa desenvolveuse ao longo dos dous meses de verán nas instalacións do Centro de Servizos Sociais, cun total de 17 menores de entre 6 e 12 anos. Para levalo a cabo contouse coa implicación de 7 persoas voluntarias e 2 técnicos municipais, que traballaron conxuntamente para ofrecer reforzo escolar, actividades de ocio e espazos de convivencia que contribuíron ao desenvolvemento persoal e social dos rapaces.
Durante xullo e agosto os nenos e nenas participaron en sesións de apoio educativo, xogos e obradoiros de tempo libre, así como en colaboracións con distintos servizos municipais, entre eles a Biblioteca, a Policía Nacional ou o Campamento Municipal de Verán. Ademais, tiveron ocasión de sumarse a accións organizadas por entidades como o CEIDA (Centro de Extensión Universitaria e Divulgación Ambiental de Galicia) ou Solidariedade Internacional de Galicia.
Desde o Concello de Viveiro salientan a importancia de proxectos que combinan educación, integración e voluntariado. “Queremos seguir impulsando iniciativas que ofrezan oportunidades de aprendizaxe e socialización a quen máis o precisa”, sinalan fontes municipais.