Viveiro aposta pola imaxinación coa Ruada de Contos 2025
O Concello de Viveiro organiza unha nova edición da Ruada de Contos, unha proposta xa consolidada no calendario cultural do verán, pensada para a cativada e tamén para o público familiar. A praza de Santa María será, un ano máis, o escenario onde a palabra, a música, a comedia e a maxia se mesturen en catro citas que buscan poñer en valor tanto a tradición oral como a creatividade contemporánea.
O ciclo abrirase o martes 2 de setembro ás 19:00 horas con Alba de Vales, que traerá a función Contos arredor do lume. Trátase dunha recompilación de relatos tradicionais e creación propia, adobiados cun canto popular. Historias narradas desde unha perspectiva de xénero e igualdade, que chegan acompañadas da voz da xograresa, obxectos simbólicos e moitas ganas de compartir co público.
O xoves 4, tamén ás 19:00 horas, será a quenda de Rendos Pequeno, que dará vida ao personaxe de Charlatán Rodríguez. Dirixido por Fran Rei, o espectáculo mestura música, maxia, humor e participación nunha proposta para todos os públicos. O protagonista preséntase como un vendedor ambulante con retranca, capaz de ofrecer solucións imposibles e contos inverosímiles, cun ritmo que engancha e fai rir sen descanso.
A programación continuará o martes 9 coa chegada de Dani García e o seu novo espectáculo TIN. Logo do éxito de Don Gelati, o mago presenta unha máquina escénica que se move e xira para resolver misterios a través de xogos de maxia colaborativa co público. Levitacións, desaparicións e retos imposibles darán forma a unha montaxe concibida expresamente para a rúa.
Pechará a Ruada de Contos o xoves 11 Fran Rei con Superheroe, unha reflexión en clave de humor e maxia sobre a vida cotiá. O artista propón ver a pais e nais como verdadeiros heroes e heroínas, quen, día a día, fan fronte aos desafíos e logran auténticas fazañas coas pequenas cousas.
Con esta programación, Viveiro reafirma a súa aposta pola cultura e pola narración oral como ferramenta de encontro, entretemento e aprendizaxe para todas as idades.