Viveiro acolle unha charla sobre o acollemento familiar
Viveiro acolle unha charla informativa sobre o acollemento familiar o vindeiro xoves 24 de xuño ás 19:00 na casa do Concello. A xornada , baixo o nome, “Contigo Florece: xerando cultura de acollemento”, estará impartida pola Asociación Galega de Familias de Acollida “Acougo”.
A intención da charla é difundir e sensibilizar sobre o acollemento familiar, como unha medida de protección á infancia e á adolescencia. Asemade, o goberno local proporcionará información básica sobre o sistema de protección, para que a cidadanía se achegue a esta realidade creando cultura do acollemento familiar e impulsando esta medida no municipio.
A charla terá unha duración de dúas horas e un carácter activo e participativo, dando un rol protagonista ás persoas participantes. Entre os contidos, trataranse conceptos teóricos para entender o marco do sistema de protección a menores, a carteira de servizos nesta materia e os axentes implicados, as características básicas do acollemento familiar e unha aproximación emocional ao tema.
Con esta iniciativa preténdese continuar sensibilizando á poboación sobre as dificultades que atopan os menores neste tipo de situacións, unhas eivas que o goberno local está comprometido a eliminar.
Por motivos de aforo do espazo onde se realizará a charla, as persoas interesadas en asistir deberán confirmar a súa inscrición no teléfono 622 672 188.
