Viveiro abre o Adral 2026 cun mes de cultura arredor da Semana Santa
A cidade de Viveiro quenta motores para a celebración do Adral 2026, un programa cultural que servirá de antesala á Semana Santa e que se desenvolverá ao longo de todo un mes ata o 28 de marzo. A proposta combina música, divulgación histórica, tradición relixiosa e iniciativas para todos os públicos, convertendo a vila nun referente cultural durante estas semanas previas ás procesións.
A apertura oficial terá lugar coa presentación do cartel anunciador da Semana Santa 2026 e do propio programa do Adral na Sala Multiusos do Concello. A partir de aí, sucederanse as citas nun calendario no que a música terá un protagonismo especial.
Entre os pratos fortes figura o concerto de Carlos Núñez, que celebrará en Viveiro o 30 aniversario de “A irmandade das estrelas” cunha dobre actuación na igrexa de San Francisco. Tamén participarán formacións como a Coral Alborada, a Banda de Música O Landro —que presentará a marcha gañadora do IV Certame de Composición “Blas García Liz”— e diferentes agrupacións vinculadas ao Conservatorio de Música da cidade, que ofrecerán recitais en distintos templos.
O programa inclúe ademais conferencias e espazos para a reflexión. O historiador Francisco Javier Sampedro Costas abrirá o ciclo cun relatorio sobre a historia e a arte da Semana Santa, mentres que o delegado episcopal de Cofradías de Mondoñedo-Ferrol, Cándido Otero López, afondará no significado do anuncio pascual nun acto que rematará coa presentación do libro-programa “Pregón”.
Non faltarán tampouco as actividades de carácter relixioso, como o Vía Crucis da catequese da UPA Viveiro, nin as propostas pensadas para o público familiar, como a presentación do libro dos Bolechas dedicado á Semana Santa viveirense.
O Adral culminará o 28 de marzo no Teatro Pastor Díaz co pregón oficial da Semana Santa de Viveiro, que correrá a cargo de José Ángel Rodríguez Méndez, nun acto que contará tamén con acompañamento musical. Con esta ampla programación, Viveiro reafirma a súa aposta por unir fe, tradición e cultura nun mes que serve de preludio a unha celebración declarada de interese turístico internacional.