Vilamartín Pequeno celebra a súa IV Festa do Requeixón cunha churrascada gratuíta e música en directo
Vilamartín Pequeno, no municipio de Barreiros, prepárase para acoller unha nova edición da súa festa máis saborosa e animada. O sábado 14 de xuño, a parroquia celebrará a IV Festa do Requeixón, un evento gastronómico e festivo organizado na honra a San Xoán Degolado, que cada ano congrega a veciñanza e visitantes nun ambiente de confraternidade, música e boa comida.
As actividades arrancarán ás 13:15 horas cunha misa solemne seguida de procesión. A continuación, dará comezo a sesión vermú, amenizada polo Grupo Lume, que porá ritmo ao mediodía no campo da festa.
A partir das 15:00 horas, o protagonismo será para o padal, co tradicional xantar popular, servido pola recoñecida Pulpería Suso de Lugo, nun espazo cuberto para garantir a celebración mesmo en caso de choiva. Como colofón á tarde e preludio da noite, haberá unha churrascada gratuíta para todos os asistentes, cortesía da organización.
A festa rematará por todo o alto cunha gran verbena que contará de novo coa actuación de Lume e da charanga Los Támega, que animarán a noite con música para todos os gustos.
Desde a organización sinalan que se disporá de amplo aparcamento gratuíto e que haberá atraccións para os máis pequenos, convertendo a festa nun evento pensado para toda a familia.
A iniciativa conta co apoio do Concello de Barreiros, a Xunta de Galicia e a Deputación de Lugo, ademais da colaboración de numerosas empresas locais que fan posible unha xornada que medra ano tras ano. “Agardámoste en Vilamartín Pequeno o día 14 de xuño!”, proclama o cartel desta edición.