VIA Alfoz celebra a súa tradicional ofrenda floral polo Día da Muller
Con motivo do Día Internacional da Muller, VIA Alfoz organiza, un ano máis, a súa tradicional ofrenda floral, un acto simbólico e aberto á participación de toda a cidadanía. O obxectivo é duplo: homenaxear ás mulleres de onte e de hoxe e lembrar a importancia de seguir avanzando cara a unha sociedade máis xusta e igualitaria.
Como cada ano, o acto será aberto a toda a cidadanía e terá lugar este sábado 8 de marzo, ás 12:00 horas, no entorno do Castelo do Castrodouro.
Como xesto de compromiso, depositaranse doce caraveis brancos, un por cada mes do ano, simbolizando que a loita pola igualdade debe ser unha causa permanente e non só unha reivindicación dun día. O branco destas flores representa a paz e a esperanza de que a igualdade sexa unha realidade compartida por toda a sociedade.
Durante a ofrenda, tamén haberá un momento de reflexión sobre os avances acadados e os retos que aínda quedan por superar. O 8 de marzo non é só unha data conmemorativa, senón un chamamento á acción para erradicar desigualdades como a fenda salarial, a dificultade de acceso a cargos de responsabilidade, a precariedade laboral que afecta especialmente ás mulleres ou a violencia de xénero, que continúa sendo unha das maiores inxustizas do noso tempo.
Desde VIA Alfoz, convidan a toda a veciñanza a participar neste acto de lembranza e reivindicación, porque a igualdade non é unha meta final, senón un camiño que debemos percorrer conxuntamente, cada día do ano.