Vegadeo únese ao programa Campus Rural para atraer talento universitario ao territorio
Vegadeo dará un paso máis na súa estratexia de loita contra o despoboamento coa incorporación ao programa estatal Campus Rural, impulsado polo Ministerio para a Transición Ecolóxica e o Reto Demográfico. A vila asturiana foi elixida para presentar este plan ao sector primario e ao tecido socioeconómico local, nun acto que terá lugar o martes 2 de xullo ás 20:00 horas no Salón de Plenos do Concello.
O Campus Rural permite que estudantes universitarios realicen prácticas remuneradas en municipios en risco de despoboamento, como é o caso de Vegadeo. As prácticas están financiadas integramente con 1.000 euros brutos mensuais por estudante, e van dirixidas tanto a entidades públicas como a empresas privadas, asociacións sen ánimo de lucro e iniciativas do rural.
A sesión informativa servirá non só para presentar a iniciativa e resolver dúbidas, senón tamén para recoller propostas e perfís de interese que o Concello canalizará cara á Universidade de Oviedo, entidade coa que se coordina o programa.
A participación no programa non implica custos para as entidades receptoras, pero é imprescindible poñerse en contacto co Concello para formalizar a solicitude. Desde o goberno municipal insisten en que esta iniciativa “non só enriquece o tecido produtivo, senón que contribúe a crear arraigamento e futuro no medio rural”.