Vegadeo homenaxea a Tarsila Fernández co Premio Muller Rural 2025
A Concellería de Igualdade do Concello de Vegadeo organiza o vindeiro xoves, 16 de outubro, un acto especial con motivo do Día Internacional da Muller Rural. A cita servirá para entregar o Premio Muller Rural 2025, que nesta edición recoñece a traxectoria vital e profesional de Tarsila Fernández Fernández.
A homenaxe celebrarase ás oito da tarde no Auditorio Félix Menéndez, situado na Casa da Cultura de Vegadeo, e contará coa presenza de autoridades locais, familiares, amizades e veciñanza. O galardón pretende salientar o papel fundamental que as mulleres teñen desenvolvido no medio rural, poñendo en valor o seu traballo, o seu compromiso e a súa contribución ao desenvolvemento social e económico da contorna.
Desde o Concello fan un chamamento á participación cidadá para acompañar a Tarsila Fernández nun día que queren que sexa unha verdadeira festa de recoñecemento colectivo. Ao rematar o acto, as persoas asistentes poderán compartir un viño español como momento de convivencia e celebración.