Vegadeo celebrará en novembro a segunda feira do viño
Tras o éxito da primeira edición celebrada en 2024, o Concello de Vegadeo anuncia a celebración da II Feira do Viño de Vegadeo, que terá lugar os días sábado 15 e domingo 16 de novembro de 2025 na carpa do Parque de Medal.
O evento reunirá de novo a adegas e expositores de distintas zonas vitivinícolas, nun formato de degustación mediante tickets de pago e con venda directa ao público. O seu principal obxectivo é dar a coñecer e poñer en valor a calidade e diversidade dos viños participantes, ademais de ofrecer unha experiencia enogastronómica atractiva tanto para a veciñanza como para os visitantes.
A feira coincidirá coa celebración da XX Exposición Internacional de Avicultura “La Pinina”, que se desenvolverá no pavillón do Recinto Feiral de Vegadeo. Esta coincidencia permitirá xerar un importante fluxo de público durante toda a fin de semana, consolidando a Vegadeo como un referente da programación outonal na comarca.
A Feira do Viño abrirá o sábado 15 de novembro, en horario de 12:00 a 23:00 horas, e o domingo 16 de novembro, de 12:00 a 16:00 horas, na carpa situada no Parque de Medal.
As adegas e expositores interesados en participar poden inscribirse a través do formulario dispoñible en liña. A participación é de balde e inclúe stands de aproximadamente 2 x 1,5 metros. O número máximo de prazas é de vinte, que se asignarán por orde de inscrición ata o luns 27 de outubro de 2025.
Para máis información, as persoas interesadas poden contactar coa Oficina de Turismo de Vegadeo no teléfono 624 126 706 ou no correo electrónico oficinaturismo@vegadeo.es.
Con esta segunda edición, a Feira do Viño de Vegadeo consolídase como unha cita para compartir, gozar e brindar xuntos, impulsando a promoción do sector vitivinícola e a dinamización económica e turística do concello.
Organiza o Concello de Vegadeo, coa colaboración de CAR Alimentación e da Asociación de Comerciantes de Vegadeo (ASCOVE).